Bansa Natin, Sariling Wika Natin, Ipagmalaki Natin

Karamihan sa mga tao ngayon, lengwahe na ang basehan ng katalinuhan. Kapag magaling ka sa iba't ibang lengwahe lalo na sa ingles, ibig sabihin matalino ka. Sa isang silid aralan, kapag kaya mong deretsuhin ang magsalita sa lengwaheng ingles, ibig sabihin ikaw ang pinakamagaling, ikaw ang pinakahinahangaan. Ngunit hindi natin napapansin, bakit may mga salita tayong alam sa ingles pero hindi natin alam sa tagalog? Hindi kaya dahil sa mas pinag-aaralan natin ang ingles kaysa sa pambansa nating wika? Bakit? Dahil gusto nating maging astig sa paningin ng ibang tao? Dahil gusto nating maging kahanga-hanga?

Para sa akin, mas kahanga-hanga yung mga taong kaya nang mag-ingles, magaling pa sa wikang Filipino. Malaking pakinabang kung magaling ka na sa Filipino, magaling ka pa sa iba’t ibang lengwahe. Paano? Dahil maaari mo itong ituro sa mga hindi marunong. Maaari mo itong ipalaganap.

Sa ating mga Pilipino, imbes na ang pokus natin ay pag-aaral ng ibang wika, bakit hindi natin ipalaganap pa ang wikang Filipino? Maraming matatalino sa atin, maraming pilosopo sa bansang Pilipinas, marami ring mananaliksik. Sa pagdiriwang ng Buwan ng Wika ngayong taon na ito, ang layunin natin ay ipalaganap ang wikang Filipino. Gamitin natin ang talino natin upang ipagmalaki an gating bansa.

Ipagmalaki natin na tayo ay Pilipino!